13.07.26
Ar hyn o bryd rydym yn ymateb i nifer o ddigwyddiadau ledled y rhanbarth.
O ganlyniad, mae ein Hystafell Reoli yn derbyn nifer uchel o alwadau brys.Mae diffoddwyr tân ac adnoddau tanau gwyllt arbenigol yn cael eu defnyddio ar draws yr ardaloedd yr effeithir arnynt, gydag adnoddau yn cael eu dyrannu yn ôl yr anghenion gweithredol a’r risg.
Hoffem ddiolch i aelodau'r cyhoedd am eu cefnogaeth a'u cydweithrediad ac rydym yn gofyn i bobl osgoi’r ardaloedd yr effeithir arnynt. Ffoniwch 999 os oes argyfwng yn unig.
Bydd diweddariadau pellach yn cael eu rhannu trwy ein sianeli swyddogol wrth i wybodaeth ddod ar gael.
Diweddariad 17:00
Mae Gwasanaeth Tân ac Achub Gogledd Cymru yn adrodd bod yr adroddiad o ddigwyddiad difrifol a ddatganwyd ddydd Sul bellach wedi dod i ben, gan bod adnoddau nawr yn gallu rheoli'r lefel bresennol o weithgarwch tanau gwyllt ar draws y rhanbarth yn effeithiol.
Mae'r sefyllfa ym Mynydd Conwy, ger Capelulo, wedi gwella'n sylweddol. Mae diffoddwyr tân yn parhau i fod yn bresennol i fonitro amodau ac asesu unrhyw risgiau parhaus.
Mae bellach yn ddiogel i'r tri deg chwe eiddo a gafodd eu gwacau o'r ardal ddychwelyd i'w cartrefi. Mae'r ffyrdd cyfagos bellach wedi ail-agor a bydd y canolfan orffwys ar agor tan 22:00 heno os mae trigolion angen cymorth. Hoffem ddiolch i'r holl drigolion am eu hamynedd, eu dealltwriaeth a'u cydweithrediad yn ystod y cyfnod hwn.
Rydym yn ymwybodol y gallai rhai preswylwyr fod yn profi problemau cyflenwad pŵer. Mae Scottish Power Energy Networks yn gweithio i adfer cyflenwadau cyn gynted â phosibl ac yn defnyddio generaduron lle bo angen i helpu i leihau aflonyddwch.
Byddwch yn ymwybodol bod disgwyl i'r tân barhau i losgi a gall gynhyrchu mwg am sawl diwrnod. Gofynnir i aelodau o'r cyhoedd gysylltu â Gwasanaeth Tân ac Achub Gogledd Cymru dim ond os ydynt yn gweld fflamau gweladwy neu os bydd mwg yn mynd yn ormodol neu'n llethol yn eu hardal.
Cynghorir trigolion sy'n cael eu heffeithio gan fwg i gadw ffenestri a drysau ar gau nes bod yr amodau yn gwella ac mae'r mwg wedi gwasgaru. Unwaith mae hwn wedi digwydd mae'n syniad da i ail agor eich ffenestri a'ch drysau.
Bydd criwiau tân yn aros yn yr ardal o amgylch Mynydd Conwy, ger Capelulo, i barhau i fonitro'r amodau ac asesu'r sefyllfa.
Mewn mannau eraill, mae diffoddwyr tân yn parhau i fod yn bresennol mewn digwyddiadau gan gynnwys Coedwigaeth Braichmelyn, Bethesda, a mynyddoedd y Rhinogydd ger Harlech, lle mae criwiau'n parhau i fonitro amodau ac asesu risgiau parhaus.
Diolch i gyd-ymatebwyr brys a sefydliadau partner y mae eu cefnogaeth barhaus wedi bod yn hanfodol trwy gydol y digwyddiad hwn.
Bydd diweddariad pellach yn cael ei ddarparu bore fory.
Diweddariad 14:30
Mae criwiau'n parhau i ddelio â thanau ar Fynydd Conwy ger Capelulo, Coedwigaeth Braichmelyn, Bethesda, ac ym mynyddoedd Rhinogydd, ger Harlech.
Mae criwiau yn bresennol ac yn monitro sefyllfa'r tân ym mynyddoedd Rhinogydd uwchben pentref Llanbedr. Mae'r tân yn debygol o fod yn llosgi am beth amser, a rydym yn parhau i apelio ar bobl i gadw draw o'r ardal.
Ym Mrynffordd, Mynydd Helygain, mae'r tân bellach dan reolaeth ac mae criwiau wedi gadael yr ardal.
Rydym yn ymwybodol bod rhai aelodau o'r cyhoedd yn parhau i fynd i grwydro'r mynyddoedd ger ardal Capelulo er gwaethaf rhybuddion diogelwch. Rydym yn annog pobl i gadw draw o Fynydd Conwy a'r ardaloedd cyfagos. Gall mynediad cyhoeddus rwystro gwaith y gwasanaethau brys, creu risgiau diogelwch ychwanegol ac effeithio ar ein gallu i ymateb yn effeithiol.
Hoffem ddiolch i gymunedau lleol am eu cefnogaeth a'u cydweithrediad parhaus, yn ogystal â'n hasiantaethau partner am eu cymorth parhaus.
13.07.26 Diweddariad bore
Mae diffoddwyr tân yn parhau i fod yn bresennol mewn nifer o ddigwyddiadau tân gwyllt a thân glaswellt ledled Gogledd Cymru y bore 'ma.
Ym Mynydd Conwy ger Capeleulo (what3words///diverged.insulated.snail), mae diffoddwyr tân yn parhau i fod ar y safle yn ymladd y tân, creu toriadau tân a monitro amodau.
Ar hyn o bryd mae'r adnoddau yn cynnwys chwe pheiriant tân, tri chyfarpar mynediad cul, uned tân gwyllt, Uned Rheoli Digwyddiadau a swyddogion gweithredol. Bydd lefelau adnoddau yn parhau i gael eu hadolygu trwy gydol y dydd wrth i'r tymheredd godi.
Mae'r digwyddiad yn parhau i gael ei reoli trwy ymateb aml-asiantaeth cydlynol sy'n cynnwys gwasanaethau brys a sefydliadau partner.
Ar hyn o bryd nid oes gofyniad am i ragor o trigolion gadael eu tai. Mae'n dal yn rhy gynnar i ddweud pan fydd trigolion o ardal Capelulo yn gallu dychwelyd adref. Os bydd y sefyllfa'n newid, bydd Heddlu Gogledd Cymru neu Wasanaeth Tân ac Achub Gogledd Cymru yn cysylltu â thrigolion yr effeithir arnynt yn uniongyrchol ac yn trefnu mynediad i'r ganolfan orffwys ddynodedig os oes angen. Mae ffyrdd Bwlch Sychnant a’r hen ffordd Conwy yn parhau i fod ar gau.
Mewn mannau eraill, mae diffoddwyr tân yn parhau i fod yn bresennol yng Nghoedwigaeth Braichmelyn, Bethesda, tra bod digwyddiadau yn ardaloedd Brynford, Sir Fflint a Harlech yn Ngwynedd yn cael eu hail-archwilio y bore yma i asesu'r sefyllfa.
Dywedodd y Pennaeth Atal Jody McEachern:
"Gweithiodd diffoddwyr tân yn ddiflino trwy gydol ddoe a dros nos yn ymateb i nifer o ddigwyddiadau tanau gwyllt sylweddol ledled Gogledd Cymru.
"Mae gwaith sylweddol yn parhau ar Fynydd Conwy a byddwn yn parhau i fonitro'r amodau'n agos drwy gydol y dydd.
"Hoffwn ddiolch i gymunedau lleol am eu hamynedd a'u cydweithrediad, a'n diffoddwyr tân, staff yr Ystafell Reoli, asiantaethau partner am eu cefnogaeth barhaus."
Gofynnir i aelodau o'r cyhoedd barhau i osgoi ardaloedd yr effeithir arnynt. Dylai trigolion Dwygyfylchi a Phenmaenmawr gadw ffenestri a drysau ar gau os ydynt yn cael eu heffeithio gan fwg a dilyn cyngor Iechyd Cyhoeddus Cymru: Iechyd Cyhoeddus Cymru’n annog y cyhoedd i gymryd rhagofalon wrth i amodau sych gynyddu’r risg o danau gwyllt.
Bydd diweddariadau pellach yn cael eu darparu trwy ein sianeli swyddogol wrth i wybodaeth ddod ar gael.
Diweddariad 20:30
Mae diffoddwyr tân yn parhau i ymateb i nifer o ddigwyddiadau tanau gwyllt a thanau glaswellt ledled Gogledd Cymru a byddant yn aros ar y safle, neu'n parhau i fonitro'r ardaloedd yr effeithir arnynt, dros nos.
Hoffem ddiolch i gymunedau lleol am eu cefnogaeth a'u cydweithrediad, a'n hasiantaethau partner am eu cymorth.
Ar gyfer y digwyddiad Mynydd Conwy, mae pawb sydd angen gadael eu heiddo bellach wedi gwneud ac wedi cael eu cefnogi trwy’r broses. Ar hyn o bryd nid oes gofyniad I ragor o trigolion gadael eu heiddo. Os bydd hyn yn newid, bydd Heddlu Gogledd Cymru neu Wasanaeth Tân ac Achub Gogledd Cymru yn cysylltu â thrigolion yr effeithir arnynt yn uniongyrchol.
Rydym yn parhau i ofyn i aelodau o'r cyhoedd gadw draw o'r ardaloedd yr effeithir arnynt er mwyn caniatáu i'r gwasanaethau brys weithio'n ddiogel ac yn effeithlon. Dylai trigolion yn Nwygyfylchi a Phenmaenmawr gadw ffenestri a drysau ar gau os ydynt yn cael eu heffeithio gan fwg a gofyn am gyngor meddygol os ydynt yn cael anawsterau anadlu.
Peidiwch â mynd i ganolfannau gorffwys oni bai eich bod yn cael eich cynghori i wneud hynny gan y gwasanaethau brys.
Bydd diweddariad pellach yn cael ei gyhoeddi bore fory trwy ein sianeli swyddogol.
Mynydd Helygain
Diweddariad 18:30
Mae ein criwiau yn mynychu tân glaswellt ar hyn o bryd ar fynydd Helygain. Rydym yn gofyn i'r cyhoedd i osgoi ardal er ei diogelwch ac i caniatáu i'r gwasanaethau brys mynd i afael â'r digwyddiad.
Braichmelyn, Bethesda
Diweddariad 17:00
Rydym yn cael nifer mawr o alwadau ynghylch tân glaswellt yn Braichmelyn Forestry, Bethesda. Diolch i chi am eich pryderon. Mae Diffoddwyr Tân yn bresennol ac yn monitro'r sefyllfa.
Mynydd Conwy
Diweddariad 16:45
Mae digwyddiad sylweddol wedi cael ei ddatgan gan y gwasanaethau brys sy'n mynd i'r afael â thân gwyllt ar raddfa fawr ger Bwlch Sychnant ar Fynydd Conwy.
Dywedodd Rheolwr Cyflenwi Gwasanaethau, Jami Jennings:
"Mae diffoddwyr tân yn parhau i weithio mewn amodau heriol i atal y tân ac i ddiogelu cymunedau, eiddo, seilwaith a'r amgylchedd cyfagos.
"Mae'r digwyddiad yn cynnwys ymateb gan sawl offer tân, adnoddau tân gwyllt arbenigol ac asiantaethau partner.
"Oherwydd maint a chymhlethdod y digwyddiad, mae disgwyl i weithrediadau barhau am beth amser.
"Byddem yn gofyn i aelodau'r cyhoedd osgoi'r ardal yr effeithir arno er mwyn caniatáu i'r gwasanaethau brys weithio'n ddiogel ac yn effeithlon. Cymerwch sylw o unrhyw ffyrdd sydd wedi’u cau, cyngor am yr angen i adael eich eiddo neu gyfarwyddiadau diogelwch a gyhoeddwyd gan y gwasanaethau brys.
"Dylai trigolion yng nghymunedau cyfagos Dwygyfylchi a Phenmaenmawr gadw ffenestri a drysau ar gau os ydynt yn cael eu heffeithio gan fwg a gofyn am gyngor meddygol os ydyn nhw'n cael anawsterau anadlu. Cynghorir modurwyr i ddisgwyl oedi ac ystyried llwybrau amgen.
"Gall tanau gwyllt ledaenu'n gyflym, yn enwedig yn ystod cyfnodau o dywydd poeth, sych a gwyntog. Rydym yn parhau i ofyn i bawb weithredu'n gyfrifol trwy osgoi defnyddio barbeciw tafladwy, sicrhau bod sigaréts yn cael eu diffodd yn llawn ac yn rhoi gwybod am unrhyw arwyddion o dân ar unwaith trwy ffonio 999.
"Mae'r ymateb hwn yn cael ei reoli mewn cydweithrediad agos â'n partneriaid, gan gynnwys yr heddlu, y gwasanaeth ambiwlans, yr awdurdod lleol, tirfeddianwyr ac asiantaethau amgylcheddol.
"Byddwn yn parhau i asesu'r sefyllfa a defnyddio adnoddau lle mae eu hangen fwyaf.
"Mae Heddlu Gogledd Cymru yn cydlynu'r strategaeth ymgiliad ar gyfer trigolion a ddylai gyflwyno eu hunain yn y ganolfan orffwys y cytunwyd arno.
"Rydym yn gwerthfawrogi amynedd a chydweithrediad y gymuned a hoffem hefyd ddiolch i'n diffoddwyr tân, staff rheoli, asiantaethau partner a gwirfoddolwyr y mae eu proffesiynoldeb a'u hymrwymiad yn helpu i ddod â'r digwyddiad hwn o dan reolaeth.
"Byddwn yn darparu diweddariadau pellach wrth i fwy o wybodaeth ddod ar gael trwy ein sianeli cyfathrebu swyddogol."
