Mae Gwasanaeth Tân ac Achub Gogledd Cymru yn falch o gyhoeddi penodiad parhaol Justin Evans ac Anthony Jones fel ei Brif Swyddogion Tân Cynorthwyol newydd.

Mae Justin ac Anthony, y ddau yn weithwyr tân proffesiynol, profiadol ac yn uchel eu parch, bellach yn ymuno â'r Prif Swyddog Tân Dawn Docx a'r Prif Swyddog Tân Cynorthwyol Helen MacArthur ar y Bwrdd Gweithredol, gan helpu i lunio cyfeiriad y Gwasanaeth yn y dyfodol a pharhau â'i daith o wella a moderneiddio.

Dywedodd y Prif Swyddog Tân Dawn Docx:

“Mae'r ddau y penodwyd yn arweinwyr ymroddedig sy'n deall bod sut rydym yn gweithio – ein diwylliant a'n gwerthoedd – yr un mor bwysig â'r hyn rydyn ni'n ei wneud. Maent yn rhannu penderfyniad i feithrin amgylchedd cefnogol, cynhwysol lle gall pawb ffynnu, a lle mae gonestrwydd a thryloywder yn ganolog i'n dull arweinyddiaeth. Rwy'n falch o'u croesawu i'r tîm yn barhaol."

Dechreuodd Justin Evans ei yrfa dros 30 mlynedd yn ôl, ym 1994, gyda Gwasanaeth Tân Clwyd, a ddaeth yn ddiweddarach yn Wasanaeth Tân ac Achub Gogledd Cymru. Dros y blynyddoedd, mae wedi dal amrywiaeth o rolau gweithredol ac arweinyddiaeth, yn fwyaf diweddar fel Prif Swyddog Tân Cynorthwyol Dros Dro.

Mae Anthony Jones hefyd yn dod â phrofiad gweithredol ac arweinyddiaeth helaeth, ar ôl dechrau ei yrfa gyda Brigâd Dân Llundain cyn treulio 19 mlynedd gyda Gwasanaeth Tân ac Achub Swydd Gaer. Ymunodd â’r Gwasanaeth Tan ac Achub Gogledd Cymru yn 2022 fel Rheolwr Ardal ac ers hynny mae wedi symud ymlaen i fod yn Brif Swyddog Tân Cynorthwyol Dros Dro.

Dilynodd y ddau benodiad broses recriwtio drylwyr, agored a chynhwysol, sy'n adlewyrchu ymrwymiad y Gwasanaeth i ddewis arweinyddiaeth dryloyw. Cymerodd ymgeiswyr ran mewn panel rhanddeiliaid gyda chyrff cynrychioliadol a chyflwynodd gyflwyniadau ffurfiol a phapurau ysgrifenedig i'r Awdurdod Tân cyn cyfweliadau gyda phanel dethol o chwe aelod o'r Awdurdod Tân – un o bob sir yng Ngogledd Cymru.

Dywedodd y Prif Swyddog Tân Cynorthwyol, Justin Evans:

"Mae'n anrhydedd mawr i mi ymgymryd â'r rôl arwain hon ac rwy’n ddiolchgar am y cyfle i helpu i lunio dyfodol y Gwasanaeth. Bydd fy ffocws ar adeiladu gwytnwch hirdymor drwy fuddsoddi mewn sgiliau a datblygiad ein pobl, gan sicrhau ein bod yn barod i gwrdd â heriau'r dyfodol a pharhau i ddarparu gwasanaeth o'r radd flaenaf i gymunedau Gogledd Cymru."

Ychwanegodd y Prif Swyddog Tân Cynorthwyol, Anthony Jones:

"Mae'n fraint cael fy mhenodi'n Brif Swyddog Tân Cynorthwyol. Gan dynnu ar fy mhrofiad, rwy'n angerddol am weithio ar y cyd i annog gonestrwydd, gyrru arloesedd, a helpu i lunio cyfeiriad y Gwasanaeth i’r dyfodol. Edrychaf ymlaen at gefnogi cydweithwyr wrth i ni symud ymlaen gyda'n gilydd."

Dywedodd y Cynghorydd Dylan Rees, Cadeirydd Awdurdod Tân ac Achub Gogledd Cymru:

"Rwy'n falch ein bod wedi gallu cadarnhau'r penodiadau hyn gydag ymgeiswyr mor rhagorol. Rwy'n hyderus y byddant yn cwrdd â'r heriau sydd o'n blaenau ac yn parhau i gynnal safonau uchel Gwasanaeth Tân ac Achub Gogledd Cymru. Edrychaf ymlaen at weithio ochr yn ochr â nhw."

Gyda'r penodiadau hyn, mae’r Gwasanaeth Tan ac Achub Gogledd Cymru yn cryfhau ei ymrwymiad i ddatblygu gwasanaeth tân ac achub modern, blaengar – un sy'n buddsoddi yn ei bobl, yn gwerthfawrogi gonestrwydd, ac yn darparu gwasanaethau cymunedau ledled Gogledd Cymru gyda phroffesiynoldeb a chywirdeb.