Helo, Kevin Jones yw Pennaeth Atal Gwasanaeth Tân ac Achub Gogledd Cymru ac rwy'n apelio ar bawb yn ein cymunedau i gymryd amser i ofalu am eu gilydd y Nadolig hwn.

Gweithio gyda'n gilydd ac edrych ar ôl ein gilydd yw'r hyn rydyn ni'n ei wneud yn ddyddiol gyda'n cydweithwyr yn y gwasanaethau brys

Diogelwch ein cymunedau yw ein blaenoriaeth - ac rwy'n apelio ar drigolion i ymuno â ni i helpu i gadw pawb yn ddiogel.

Mae'r cyfnod cyn y Nadolig a'r Flwyddyn Newydd yn aml yn gyfnod prysur iawn – felly fy apêl i chi yw cymryd ychydig funudau yn unig i ystyried diogelwch tân a meddwl sut y gallech chi helpu teulu, ffrindiau neu gymdogion i gadw'n ddiogel rhag tân y Nadolig hwn, a sicrhau bod ganddynt larymau mwg sy’n gweithio wedi'u gosod ar bob llawr yn eu cartref.

"Bydd ein staff hefyd yn cynnal boreau coffi i gysylltu â'n cymunedau – rhannwch y wybodaeth am y digwyddiadau hyn fel y gallwn ni i gyd ofalu am ein gilydd y Nadolig hwn.

Darllenwch fwy am ein deuddeg awgrym ar gyfer diogelwch tân yr ŵyl a digwyddiadau sydd ar y gweill yn y cyfnod cyn cyfnod y Nadolig yma.

Mae Gwasanaeth Tân ac Achub Gogledd Cymru yn annog pobl i gadw'n ddiogel ac amddiffyn eu cartrefi rhag tân drwy ddilyn y deuddeg awgrym ar gyfer diogelwch tân dros y Nadolig a’u rhannu gydag eraill:

• Gwnewch yn siŵr fod eich goleuadau Nadolig yn cydymffurfio â'r Safon Brydeinig. Defnyddiwch RCD bob amser ar offer trydanol awyr agored (Mae hon yn ddyfais ddiogelwch a all achub bywydau trwy ddiffodd y pŵer ar unwaith).
• Peidiwch byth â rhoi canhwyllau ger eich coeden Nadolig, eich dodrefn neu eich llenni. Peidiwch â'u gadael yn llosgi heb fod unrhyw un yn cadw llygad arnynt.
• Gwnewch yn siŵr bod eich teulu ac ymwelwyr dros gyfnod yr ŵyl yn gwybod beth i'w wneud mewn argyfwng. Sicrhewch eich bod yn ymarfer cynllun i ddianc rhag tân.
• Gall addurniadau losgi'n hawdd - peidiwch â'u gosod yn sownd i oleuadau neu wresogyddion.
• Diffoddwch offer trydanol pan nad ydynt yn cael eu defnyddio, oni bai eu bod wedi'u cynllunio i aros ynghyn.
• Cymerwch ofal arbennig gyda goleuadau Nadolig. Diffoddwch nhw bob amser a thynnu’r plwg o’r wal cyn i chi fynd i'r gwely. Mae'r Nadolig yn adeg pan fyddwn yn defnyddio mwy o eitemau trydanol - peidiwch â gorlwytho socedi a phlygiau. Yn lle hynny defnyddiwch socedi lluosog ar lid sydd â’r ffiws priodol ar gyfer mwy nag un teclyn.
• Mae'r rhan fwyaf o danau yn dechrau yn y gegin - peidiwch byth â gadael pethau i goginio heb fod unrhyw un yn cadw llygad arnynt. Mae'r risg o ddamweiniau, yn enwedig yn y gegin, yn fwy ar ôl yfed alcohol.
• Os ydych chi'n bwriadu dathlu gyda thân gwyllt, sicrhewch eich bod yn eu storio mewn blwch metel, darllenwch y cyfarwyddiadau, peidiwch byth â mynd yn ôl at dân gwyllt wedi'i gynnau a chadwch fwcedaid o ddŵr gerllaw.
• Sicrhewch fod sigaréts wedi’u diffodd yn llwyr
• Gwiriwch y batri yn eich larwm mwg bob wythnos a defnyddiwch y Nadolig i'ch atgoffa i'w lanhau a gwaredu llwch ohono.
• Cadwch ganhwyllau, tanwyr a matsis allan o gyrraedd plant.
• Cymerwch amser i wneud yn siŵr bod perthnasau a chymdogion oedrannus yn iawn y Nadolig hwn. Gwnewch yn siŵr eu bod yn ddiogel rhag tân, yn ogystal â gwirio eu lles.

Cystadleuaeth Diogelwch Nadolig Facebook

Ewch i'n tudalen Facebook i gymryd rhan yn ein cystadleuaeth 12 diwrnod o ddiogelwch y Nadolig sy'n dechrau ar 13 Rhagfyr a chael cyfle i ennill £30 mewn talebau archfarchnad

www.facebook.com/northwalesfire

Gwasanaeth Carolau Gwasanaethau Brys ar y Cyd

Byddwn yn cynnal Gwasanaeth Carolau Gwasanaethau Argyfwng ar y Cyd blynyddol yng Nghadeirlan Llanelwy ddydd Llun, 9 Rhagfyr am 7pm - dewch i ymuno â ni!

Digwyddiadau bore coffi

Awydd am baned? Mae ein Tîm Diogelwch Cymunedol wedi rhoi sylw i chi!

Bydd ein Tîm Diogelwch Cymunedol yn cynnal y Bore Coffi isod - gwnewch yn siŵr eich bod yn galw heibio am fragu a sgwrsio gyda'r tîm am ffyrdd y gallwch chi a'ch anwyliaid eich cadw'n ddiogel dros gyfnod y Nadolig.

Gorsaf Dân Dolgellau

Maes Talarn, Dolgellau

09/12/2024 – 10.30am -12.30pm

Gorsaf Dân Y Rhyl

Coast Road, Rhyl

10/12/2024 -10.30am -12.00pm

Wrecsam

Eglwys a Neuadd Gymunedol Sant Margret, Chester Road, Wrecsam

18/12/2024 -10.30am – 1:00pm